#افكار_مجنونة #المقايضة قبل مايخترع الان

#افكار_مجنونة #المقايضة
قبل مايخترع الانسان العملة، كانت فكرة “المقايضة” موجودة على مبدء (خود بطاطا وعطيني خبز) بهي ببساطة!
للأسف ماعندي خبرة اقتصادية لاعرف حالياً هالمبدىء شو صار في، بس ع الأكيد تغير وطور وأنا واثق انو الشركات عم تشتغل في بس بطريقة تانية.
المهم!
انت شو عندك تقدمه، وتاخد بداله شي انت بحاجته؟
طيب، خلينا نقول انت بدولة معينة، ولسبب معين مامعك مصاري لاتاكل ولاتشرب شو بتعمل؟
أكيد مارح تدين! أكيد مارح تشحد! أكيد بدك تلاقي طريقة.
الطريقة هية انك فوراً تعرض خدماتك المهنية لشخص آخر مقابل “شيء” مو مقابل مصاري، مثال:
يوم تدخل عصاحب السوبر ماركت وتقلو انا بشتغل طول النهار عندك مقابل 50$ رح يرفض، بس وقت تقلو مقابل (كيس خبز وعلبة حليب وكيلو تفاح) – مستحيل يرفض!، وان رفض غيرو رح يوافق.
بامكانك اليوم تستخدم هذا النموذج ع كل حياتك مو بس ببساطة المثال المذكور فوق – يعني:
انت مصمم ، مبرمج، محاسب الخ .. شو ماكنت – انت عندك شي تقدمه، حدد شو بدك تماماً، روح للشخص يلي عندو هالخدمة، وعروض عليه المقايضة، خبرتك يلي بدو ياها بالمنتج يلي عندو يا. نعم بهالبساطة!
نجاح وفشل هالطريقة، بتحكمها اختيارك للشخص والشي يلي بدو ياه.
مافيك تروح لعند صاحب السوير ماركت وتقلو بترجملك !! (رح يقلعك) 🙂
بدك تعطي شي هو بدو يا.

أحمد ادلبي

هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.

#افكار_مجنونة #السيرة_الذاتية اذا ما كان

#افكار_مجنونة #السيرة_الذاتية
اذا ما كان عندك CV محترمة من هدول يلي بيطلبوهم أقسام الـ HR بالشركات، شو بتساوي؟ تقعد بلا شغل مثلاً!!
طبعاً لا ..
في شركات عندها شي اسمو Internship programs بتسمح للأشخاص يلي ماعندهم خبرة ليشتغلو ضمن فريقها بشكل مؤقت (هنن بيستفيدو منك وبشغلوك قصص معتة) وانت بتنزلها ع سيرتك الذاتية انو اشتغلت بالشركة الفلانية مدة كذا شهر.
الفكرة وين؟
● 30% من الموظفين يلي بيكون ضمن هالنوع من البرامج بيتثبتو وبصيرو موظفين دائمين.
● غالباً هي البرامج بتكون مأجورة (بس مو هالشي المهم).
● للأسف البلاد العربية ماعندها لسا هادا الفكر، بس هنن برحبو في بشكل تطوعي.
حقيقة:
من فترة سنتين اجاني شخص دق الباب وفات علي وقلي بدي اشتغل معكم (هيك دج)، وقلي انا مابدي مصاري جربني ٣ شهور بس!
الشب اشتغل معي ٣ شهور وفعلآً اثبت جدارتو (كان قول وفعل) ثبتو بالقسم وكانت هي بداية حياتو المهنية.
ملاحظة: Internship programs يلي ذكرتها اول شي لازم تكون ترجمتها فوراً بحال ماعرفت ترجمتها، ولازم تكون على الأقل عملت عليها بحث بغوغل اذا مافهمت شو معناها بعد ماترجمتها، واذا ماعملت كل يلي ذكرتلك ياهن فانت مقصر كتييييير بحق حالك، وبنصحك تروح تعمل كاسة شاي وتقعد بينك وبين حالك – وتحكي مع حالك جوزين كلام بهزو البدن!
لاتفكر انو بكير .. انت متأخر كتير ..
ملاحظة تانية مشان يلي بدو يسألني:
يلي عمل هيك وترجم وراح غوغل، لاتفرح بحالك انت عملت الشي يلي لازم ينعمل، فلا تفرح بحالك كتير 🙂
تبقو بخير ..

أحمد ادلبي

هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.

#افكار_مجنونة #هوايات في أكتر من شخص راس

#افكار_مجنونة #هوايات
في أكتر من شخص راسلني وسألني اني ليش عم ركز ع موضوع الهوايات، وشو رح يستفيدو السوريين منها (ع اساس انو الهوايات رفاهية مالنا فيها حالياً) ؟
طبعاً ليلي حابب يعرف الجواب، المعلومات يلي بهادا البوست رح تغير رأيو تماماً.
الهواية شغلة مهمة كتير بحياة اي انسان، وفعلاً مابعرف ليش نحنا معتبرينها رفاهية.
الموسيقى، الرياضة، قيادة السيارات، ألعاب الخفة، التصوير، الغناء .. وغيرها .. كانت معظم العائلات السورية خصوصاً والعربية عموماً، بيعتبروها مضيعة لوقت ابنهم، والأجدى انه يضيع وقتو بالدراسة، وهون المشكلة!
جيل كامل كبر من دون هوايات .. يعني جيل مالو عرفان شو يعمل بوقته الضايع، والأهم من هيك جيل ما احترف مهنة!
طيب خليني كون واضح أكتر وبسط الموضوع من دون طرح اي نظريات من خلال هادا المثال:
طفل عمرو ١٣ سنة عائلته شافت انه بحب الموسيقى، فبدأت الأم تاخد خطوات ايجابية بدعم موهبة ابنها من خلال مساعدته بتعلم الاساسيات، والأب اشترى (بيانو صغير) احتراماً لميول طفله.
طبعاً هادا الطفل من خلال ردة فعل اهلو تلقائياً رح يعزز قيمة الشي يلي حبو (ورح يصدق موهبته)، وكلمة (رح يصدق موهبته) كلمة بدها تفكير كتير، اساساً انت يلي عم تقرا كلامي في عندك موهبة ومالك مصدقها، وهية هلق “جثة” بتتمنى لو احييتها بيوم من الأيام.
بعد مايصدق هادا الطفل موهبته، تلقائياً رح يبدأ باحترافها، وبمساعدة حكيمة من العائلة هادا الطفل رح يكبر مع هالهواية ويكمل دراسته ويمكن يتخرج (مهندس، طبيب، اعلامي ..) شو ماكان بس هو بيملك هواية، أو بالأصح عندو مهنة!
اي نعم (مهنة) اليوم انت وقد تتقن العزف ع آلة موسيقية، أو تتقن رسم الوجوه، أو حتى صرت محترف بأحد الرياضات، فمعناها انت دخلت من بابها وبامكانك ببساطة تجيب مصاري من هالهواية، وطبعاً الاحتراف دايماً بترتبط بكلمة “هاوي” لانك بعمرك مارح تحترف شي اذا كنت مابتهوى اصلاً.
حقائق:
● سوري موجود بألمانيا (طبيب) عم ينتظر تعديل شهاداته، وخلال فترة انتظاره قام بتدريس (البيانو) لعائلة عربية من 7 اشخاص وكانت كفيلة بسد احتياجاته المادية خلال فترة انتظاره – ببساطة استفاد من هوايته يلي بحبها.
● واحد تاني موجود بالسويد بيشتغل بالمجال البنكي، بس هوايته الرسم ، صار يرسم وجوه الناس بالطرقات بطريقة كوميدية وهادا الشي جبلو مدخول كتير حلو.
● صبية طلعت على دبي لتشتغل بمجال الاعلان يلي هو دراستها بالاصل، وبعد خيبات امل مالقت وظيفة، صارت تشتغل بالشي يلي بتحبو طول عمرها وبتهوا (صناعة تحف الخشب ) يلي اساساً كانت هوايتها وتتسلى فيهن ببيتها. ومدخولها حالياً افضل من مدخولها لو لقت الوظيفة يلي عم دور عليها.
كل هالحقائق مابتهم.. يلي بهم انت شو عندك لتستفيد منو.

أحمد ادلبي

هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.

#افكار_مجنونة #أبطال_الانسانية شبكة Duba

#افكار_مجنونة #أبطال_الانسانية
شبكة Dubarah خلتني اتعرف على ناس “استثنائيين”، حولتهم الاوضاع يلي بـ #سوريا لمنظمات انسانية متنقلة، وأعمالهم غالباً مابقولو عنها، لكون غايتهم “مساعدة الناس” وبس!.
وطبعاً هالصبايا والشباب بشكل تلقائي ونظراً لتحول عواطفهم للناس صارو يفكرو بجملة “هنن” وكلمة الـ “أنا” أو “نحن” مرفوضة بالنسبة الهم، وعقدة الذنب حاملينها وماشيين، حتى انهم استفذو مدخراتهم، صحتهم، وحتى دموعهم يلي مابيمرق يوم الا وماتشوفوها.
أنا عم احكي هون عن فئة رائعة كان ومايزال الها دور كبير بالحركة الانسانية، ورح نضل لطول العمر شاكرين فضلهم وانسانيتهم.
اغلبكم ترك دراسته!
معظمكم ترك شغله وحياته، وشبه تفرغ للعمل الانساني!
همسة:
بس بدي منك تصير تفكر بحالك “شوية” لتقدر تكمل بمساعدة الناس.
انتو دهب نادر مافي منكم، وصلتو لمرحلة عم تعطو الناس شي انتو ماعندكم يا.
ساعد حالك لتستمر بمساعدة غيرك.

منحبكم

أحمد ادلبي


هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.

#افكار_مجنونة #الوقت بتعرف انو افضل استث

#افكار_مجنونة #الوقت
بتعرف انو افضل استثمار ممكن يحصل عليه اي شخص عندو مشروع تجاري او بدو يكمل دراستو هو “الوقت”.
بحسبة بسيطة عندك 17 ساعة باليوم، شو عم تعمل فيهم!!
اقتراحي الك مايلي:
– تخصيص نصف ساعة يومياً (لتفكر) .. شو يعني تفكر؟
يعني تفتح الانترنت وتبدا تتجول بالامور المفيدة من فنون وعلوم، وحط ببالك الف سؤال وسؤال، حاول دور على اجوبة براسك، يلي بدورها رح تفتحلك بواب جديدة، ومن خلالها رح تشوف ابداع غيرك والناس شو عملت وانت لساتك محلك، كل هالشي رح يعطيك جرعة حماس مو قليلة.
– تخصيص ساعة يومياً لتتعلم لغة جديدة / على الأقل تحسن فيها لغتك الانكليزية.
– تخصيص نص ساعة يويماً لممارسة هوايتك (رياضة – موسيقى – غناء – نطوطة) 🙂 يلي بدك يا.
– تخصيص ساعة يومياً للعائلة / يتطلب فصل راوتر الانترنت خلال هي الساعة 🙂
– 7 ساعات عم تنامهم (لو شو مابقلك مستحيل تنزل عن هادا الرقم) محفور بجيناتنا.
– طبعاً فيما تبقى من الوقت فانت للأسف عم ضيعه “وتحرقه” بوظيفتك الحالية، ان كانت 8 ساعات ولا 12 ساعة، تذكر دوماً انو “الوظيفة” هية محطة مؤقتة بحياتك الرائعة، حاول تستفاد منها وتتعلم من “كيس غيرك” بس ابداً لاتحاول تستمر فيها وتخلي نفسك “عبد” تحت رحمة شخص أحسن منك! … لأنو الأخير اساساً قدر يأسس شغل لحاله، فحاول تكون انت هادا الشخص، مو يلي عم يشتغل عنده!
اذا قدرت فعلاً تستفاد من هالساعات متل ماقلتلك، صدقني رح تشعر بفرق كبير من كل النواحي، فثقافتك رح تزيد، ومستوى تفكيرك الابداعي واستقرارك النفسي رح يرتفع، ويلي بدوره رح يخليك تاخد قرارات صحيحة بحياتك ويرفع من جودة عملك.

أحمد ادلبي


هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.

#افكار_مجنونة #نصيحة_للمكتئبين كتير سوري

#افكار_مجنونة
#نصيحة_للمكتئبين
كتير سوريين اليوم صارو ببلاد الله الواسعة، بس للأسف كلهم بنو مخططاتهم واهدافهم ليوصلو على بلد معين، وبس يوصل للأسف وبعد فترة قصير بتصير معو حالة اكتئاب مزمنة تحديداً بس تخلص مرحلة “البرعة” والاعجاب والانبهاد بهالبلد الجديد.
تحديداً هالاكتئاب مالو من فراغ! .. ببساطة عقلك وكيانك ماعندو حالياً اي شي يشتغل عليه، بكون اهدافك الاخيرة يلي كانت مسجلة عندك كانت آخرها وصولك للبلد – طيب انت وصلت وبعدين !! هون بتجي الصدمة ويلي بتاخد غالباً اشهر طويلة ليطلع منها الشخص.
كرمال هالموضوع بتمنى تاخدني بحلمك وتفهم هالكم كلمة بحال كنت أحد المكتئبين :
– عندك سنة كاملة لازم تقضيهم كيف ماكانو من دون (عمل) قدر المستطاع بدي ياك تستثمر هالسنة بانك تعرف البلد منيح وتتعلم اللغة تبعها بشكل ممتاز وبحال بدك تكمل تعليمك ياسلام لو لقيت منحة.
– تعمل شبكة اجتماعية حوليك: يعني تصير تتعرف ع ناس، بس انتبه كل ماعرفت ناس صار عندك مشاكل أكتر، تعرف ع ناس بقدر وبحكمة وكون انتقائي وخليك قريب من يلي بينفعك وبعيد عن يلي مابينفعك.
– بدي منك تعزز هواياتك .. اي نعم شو بالعادة بتحب تعملو بوقت الفراغ (موسيقى، رياضة الخ ..) اي شي المهم بدي تزبط هالموضوع وتعمل لالك ساعة او نص ساعة يومياً لتعمل هالهواية، بحال ماكان عندك هواية اتمنى تبحبش جواتك منيح وتكتشف شو بتحب، انا عم انصحك هيك لانو هالهواية هية منفذك الوحيد لتفضلك عن واقعك بغض النظر شو كان.
– الانترنت مالو سكايب وواتس أب وفيس بوك !! روح شوف غوغل، ويكيبيديا، وغيرها من محركات بحث المعلومة، لاتخلي سؤال ببالك الا ودور ع اجابته، قدامك كنز حاول تستفاد منو قدر الامكان، لازم خلال سنة تتعلم امور ماكنت متوقع تعلمها.
– كون سفير سوريا باخلاقك وابداعك واصالتك، كون المواطن الصالح بهالبلد، لاتحاول تتشاطر او تتلاعب، اي شي رح تعمله رح يكون ضدك، واتذكر انك مالك بالجنة، انت مراقب ع الهوا يلي عم تشمه، واي خطىء رح ترتكبه بهالمرحلة رح يأثر على وضعك كتير لقدام.
– قدر الامكان حاول ماتغير نوع عملك وخصوصاً اذا كنت بتشتغل بالمهن اليديوية او الحرفية، حاول بذكاء تكيف يلي بتفهم في بهالبلد يلي انت فيها.

احمد ادلبي

هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.

#افكار_مجنونة #دوبارة #كيف_تجيب_مصاري اس

#افكار_مجنونة #دوبارة
#كيف_تجيب_مصاري
اسرع واسهل طريقة لتعرف اذا المشروع يلي بدك تعملو بشكل مبدئي ناجح ولا فاشل، وتعرف تحدد تماماً شو بدك
بتسأل حالك ٥ مرات (لماذا) أو Why؟
مثال:انا بدي افتح مكتب خدمات طباعية بالمانيا!
اول (لماذا): ليش بدك تفتح؟
جواب: لانو الخدمة مالها متوفرة بالمنطقة يلي انا في
ثاني (لماذا): ليش مالها متوفرة؟
جواب: لانو المنطقة بالاساس سكانية ومافيها مكاتب او جامعات ليطلبو هي الخدمة
ثالث (لماذا): ليش منطقة سكانية؟
جواب: لانو منطقة حلوة بطبيعتها وهادية وبعيدة عن العاصمة او المنطقة يلي فيها الشغل.
رابع (لماذا): ليش بعيدة عن المناطق يلي فيها؟
جواب: اي شو رح تعجزني !!!! شو بعرفني، بس بعتقد لانو هية بالاساس خصصوها لتكون سكن مو للشغل
خامس (لماذا): ليش خصصوها للسكن؟
جواب: اففففف والله مابعرف يمكن بدهن يهربو من عجقة الاشغال وبدهن مكان بعيد عن الضوجة والشغل.
هون خلصت الاسئلة وبعتقد هون انت عرفت بعد هالأسئلة اذا مشروعك ناجح ولا لا!. وبحال مثال تاني يمكن تكون رضيان ع الاجوبة ويبشرك بالخير انك بالمكان الصحيح والاجوبة رح تعطيك معلومات مهمة لتحدد مكان ونوعية الخدمة لتقدمها حتى.
هادا الاختبار مالو مهني ولالو دراسة معتمدة، بس أنا بعتمدو شخصياً باي موضوع بدي ابني من خلالو قناعة مبدئية.

أحمد ادلبي

هي الأفكار وغيرها يمكن تلاقيها بسيطة بحكم خبرتك، بس في كتير ناس بالنسبة الها حل! ياريت تشارك هالفكرة مع كل اصدقاءك، مابتعرف مين بيستفاد منها.